طارف علي الأجواد عندي لومه.. للشاعر الغنَّاي اغنيَّة

طارف علي الأجواد عندي لومه
وعندي دفاتر كل حد وَرْسومه
عندي برمه
وعندي مْعَ الأجواد شان وحرمه
والأجواد في وان الشدايد مرمى
كيف المناهل في العطش معلومه
والألياش حتى الخير داير عرمه
علي أفَّامهم ماي واخذه العزومة
طارف علي الأجواد عندي طلَّه
الأجواد واللِّي يفرحوا بمعلَّه
وكيف الذهب الأجواد ما تخلَّى
وقت الكدر مطلوب جايب سومه
والعفن كانك جيت عند محلَّه
يبدا يتقجدر ضايقات أعلومه
كل حد عنده شبه ويماثلََّه
وفيه فرق بين الصقر بين البومه
طارف علي الأجواد بنجاوبها
( الأجواد واللِّي باهيه منسبها )
طارف علي الأجواد بنجاوبها
والأجواد ديما أجواد في نايبها
والعفن كانك جيت عنده سبهه
تسهيمه وتكشيره وبرمه زومه
وكان قلت كلمةْ حقّ بيكذِّبها
تبي هدرزه يْوحَّلَكْ في خْصومه
والأجواد مِ الحياةْ لو كان بتسلبها
صبَّاره وحمَّاله وهي مظلومه
كل حد عنده نصّ مثله شَبْهَهْ
وفيه فرق بين المسك بين الثومه
طارف علي الأجواد جينا نحفـُّوا
كدر وقت منَّه نعرقوا ونجفـُّوا
والأجواد لا شافوا الضيف يخفـُّوا
اصغار نفس ولهم صايبه مقيومه
والألياش كأنَّك جيتهم يلتفـُّوا
لا مباشرة لا شرهبة زمزومه
دامن احذاهم ضيف ما يصفـُّوا
عليهم طيور السود دارن حومه
ولا عمرهم قالوا كلام ووفـَّوا
يخلـُّوا الثناء ويدوّروا الحشومه
طارف علي الأجواد بنخبِّرهم
والأجواد ربِّي إن شا الله يكثرهم
وإن شا الله عَ الصَّايبه يقدِّرهم
جميع من يْجي عاشم يْجوا في لومه
والأجواد كانك جيت في مدورهم
يبروا العليله الضالعة المهشومه
والألياش حتي الجار لا جاورهم
كل يوم عركه وعِشَّته مهدومه
والألياش حتى بْمالهم قاهرهم
قلال أدب صار لهم كما الكرومه
حديد شيركو التليين ما يكسرهم
ما تحيد عاصيهم إلاَّ الحكومه
طارف علي الأجواد عندي عادة
الأجواد واللِّي يطربوا بميعاده
والأجواد ديما عندهم زوَّاده
تديِّر علي اللِّي طاح ناضت قومه
وعيِّل ضنا الألياش فيه براده
الشَّايب تْجيه يْشفـَّقه بهرومه
اللِّي قاصده قوله يبيه اسناده
وين خبَّره زاده ورقّ اعزومه
والأجواد قولي ما لهاش احداده
أوصاف باهية وَطْبَاعهم مقسومه
فيهم اللِّي يديِّر سخي بزناده
وفيهم اللِّي يقسم مْن الْمحتومه
وفيهم اللِّي كانَّه حضر ميعاده
يْصفِّيه ما يخلـِّيش فيه خصومه
والأجواد فضلهم ما نقدراش اعداده
والأجواد حتى ميَّته مرحومه
والألياش غير تهدر بلا ردَّاده
بلا عقل منطقهم مْنِ الْبلعومه

* الغنَّاي بن عمَّار بن خليفة اغنيَّة الورفلِّي ـ الكملوم 1889 ـ 1978