اكيد الكلمة هدي مبجلة ومستحبة ومن صفات المسلم ان يتوكل على ربي في كل شي ويسلم امره لله ويكون على يقين ان ما فيش حاجة تم الا بمشيئه الله .... لكن...
اصبحت الجملة هدي تنقال على كل شي وفي اي وقت ومع اي حد حتى انها بدت تفقد معناها في بعض الحالات .....
يعني مثلا :
واحد تقوله انت محمد ؟ يقولك : ان شاء الله , تخدم هني ؟ يقولك : ان شاء الله , ليك السيارة هدي ؟ ان شاء الله .... لا وشوفو المرضى : يوجع فيك جنبك ؟ ان شاء الله ... معاين عليه قبل ؟ ان شاء الله .... باهي عندك تحاليل معينة مدايرها ؟ ان شاء الله ...
يعني هيه حاجة صارت وتمت وما زال يقولو ان شاء الله , طبعا هم قصدهم ( ايه )
حتى الاجانب تعلموها من غير ما يعرفو شن معناها
لو كل واحد يقول فيها يتدبر معانيها يبقى احنا اكثر شعب متمسك بالدين في العالم ... ان شاء الله
هية المفروض تنقال لما حد ينوى يدير حاجة باش يحس ان كل شي بايد ربي , قال الله تعالى في سورة الكهف : { وَلا تَقُولَنَّ لِشَيْءٍ إِنِّي فَاعِلٌ ذَلِكَ غَداً (23) إِلاَّ أَنْ يَشَاءَ اللَّهُ وَاذْكُرْ رَبَّكَ إِذَا نَسِيتَ وَقُلْ عَسَى أَنْ يَهْدِيَنِ رَبِّي لِأَقْرَبَ مِنْ هَذَا رَشَداً}
السبت ديسمبر 04, 2010 5:52 pm