ثلاثيات ليبية
تلاته يتمنوهم الليبيين السكن في طرابلس والعلاج في تونس والوصول الى سن التقاعد.
تلاته ماتحلمش بيهم السفر للسياحة وتصيف مع عايلتك و كأس العالم في ليبيا.
تلاته صعب تتخلى عليهم الماء ,والهواء ,والبازين.
تلاته لازم تتخلص منهم التفنيص والتلقيح والسؤال عالمخطط.
تلاته تسبب الاحباط الواسطة والديون والمنتخب الليبي.
تلاته يرفعوا الضغط الملح وزحمة المرور والعيل كان عشش.
تلاته تسبب الغرور الفيلا والهمر وبدلة الحرس البلدي.
تلاته ميحبوهمش الليبيين التعليم والمصريين والشبشب المقلوب.
تلاته ميرقدوش في الليل المديون والخانب وواحد نايضه عليه السوسه.
تلاته شبه اختفوا من ليبيا الدلاع الطويل واحترام الشيابين والفراشية.
تلاته ماتحسش بطعمتهم الى في ليبيا شاهي العالة ومبكبكة على الحطب والبورديم.
تلاته تدعيلهم بالهداية البلعوط والمحسدي واللي يشجع في الهلال.
تلاته ماتستغربهمش في ليبيا واحد قاص السريع على رجليه وواحد يسوق في الاتجاه المعاكس وواحد متعين عمره عامين.
تلاته تتمنى ماتتصبحش فيهم سواق افيكو مستعجل وطابور طويل في الشيل و مديرة مدرسة في ايدها عصا.
تلاته متعرفش امتى تخشلهم السجن والمستشفى ومكتب القوى العاملة.
تلاته ماليهمش معنى إلا في ليبيا العسلوز والزميطة والعصبان.
تلاته ربي ايفكك منهم مجاري مفتوحه وكلب مطلوق ورشاده طايشه.
تلاته ايديروا فيهم الليبيين بس الدفال على راس بمبلة الغاز والهروب من السيمافرو الاحمر وتنفيض الفرشة متاع الماكله من الروشن.